قلبك

ـ1ـ
قَلْبِكْ أَبْيَضْ مِتْل الزَّنْبَقْ
مِتْل التَّلْج الْـ عَ صِنِّينْ
هْنِيَّالْ اللِّي فِيكِي تْعَلَّقْ
مَا بِتْخَوِّفْ عُمْرُو سْنِينْ
رَبِيعُو.. بِيبَلِّشْ هَلَّقْ
وْتِشْرِيِنُو.. مَا فِي تِشْرِينْ!
ـ2ـ
قَلْبِكْ.. عَمْ يِنْدَهْ بِالْغُرْبِه
حِبَّيْتَكْ.. عَكْس التَّيَّارْ
شُو بِعْمُلْ؟!.. جَاوَبْنِي رَبِّي
حِبَّا.. عْبِدْهَا.. عْمِلْهَا مْزَارْ
"عبلَى".. حُبَّا مَنُّو كِذْبِه
الْـ بِيحِبُّوا مَنُّنْ كُفَّارْ!!
ـ3ـ
قَلْبِكْ.. داوِخْني بْدَقَّاتُو
وْشُو بْحِبّْ عْلَيْهُنْ إِتْسَمَّعْ
مْنِ شِعْرِي اسْتَوْحَى نَغْمَاتُو
وْمِنْ عُمْرِي نُوتَاتُو جَمَّعْ
قُولِيلُو يْخَفِّفْ ضَرْبَاتُو
بَسْ يُوجَعْ.. قَلْبِي بْيِتْوَجَّعْ
**